Medaya Fields

La Medaya Internacional pa Descubrimientos Sobresalientes en Matemátiques, más conocida pol nome de Medaya Fields, ye una distinción que concede dende 1936 la Xunión Matemática Internacional de forma cuatrienal, siendo'l máximu gallardón que da la comunidá matemática internacional. El so nome foi-y dau n'honor del matemáticu canadiense John Charles Fields^[1] y solo concédese a matemáticos con edaes non cimeres a los 40 años, con una retribución de 15.000 dólares canadienses.

Ante la inesistencia del Premiu Nobel de Matemátiques instauróse esti gallardón a los meyores matemáticos, siendo dada a una o más pesonas.

La medaya ta chapada n'oru y foi diseñada por Robert T. McKenzie en 1933. Nel anverso tien la cabeza del matemáticu griegu Arquímedes y l'inscripción "Transire suum pectus mundoque potiri" ("Dir más allá d'unu mesmu y apoderar el mundu"). Nel aviesu figura una esfera inscrita nun cilindru y l'inscripción "Congregati ex toto orbe mathematici ob scripta insinia tribuere" ("Los matemáticos de tol mundu axuntar pa dar esta medaya por escritos escelentes").

1. ↑ «About Us: The Fields Medal». The Fields Institute, University of Toronto. Consultáu'l 21 d'agostu de 2010.